打開你的眼界

平時出街食飯，兩個人開心 share 嘢食好平常，但如果其中一份係「無限任食」嘅套餐，你又覺得可唔可以兩個人一齊食、一齊加底呢？今個星期，Threads 同各大社交平台就被一單極具爭議性嘅「薯條風波」洗版。有位港女因為企圖 share 任食配菜被餐廳拒絕，嬲到上網公審，結果反而被全網鬧爆缺乏常識！即刻跟 OPTour 一齊睇吓發生咩事啦！ 事件起因：沙田法國菜「無限添加」惹爭議 事緣喺今個星期，有兩名食客去到沙田新城市廣場一期一間知名嘅法式餐廳（網民根據線索推斷為 Odelice!）食晚飯。兩個人分別叫咗一份普通嘅一人餐，同一份主打「無限添加配菜」嘅牛扒套餐。 據事主喺 Threads 嘅帖文所講，佢哋一開始已經問清楚職員，個牛扒套餐係咪有得無限 refill 黑松露薯條同手工意粉。職員當時已經「面有難色」咁表示，通常要食完一份先可以再 refill。事主聲稱覺得唔想浪費食物，於是兩人就齊齊 share 枱面上嘅嘢食。點知當佢哋清空咗碟薯條，舉手要求「無限添加」嗰陣，職員就出聲制止，表明「無限添加嘅食物只限點餐者食用，唔可以 share」。